14 noyabr 2023-cü ildə Brusseldə Şərq Tərəfdaşlığı Vətəndaş Cəmiyyəti Forumunun 15-ci İllik Assambleyası işə başlayıb. Tədbirə Şərq Tərəfdaşlığının çoxtərəfli əməkdaşlığının gələcək formasını müzakirə etmək üçün Şərq Tərəfdaşlığı və Avropa İttifaqı vətəndaş cəmiyyəti təşkilatlarının 250-dən çox nümayəndəsi qatılıb. İllik Assambleyada Azərbaycan Milli Platformasından da 20 nəfər nümayəndə iştirak edir.
Tədbir çərçivəsində Şərq Tərəfdaşlığı ölkələri və Avropa İttifaqının qərar qəbulunda rol oynayan nümayəndələri ilə vətəndaş cəmiyyəti institutlarının təmsilçiləri arasında region üçün əhəmiyyətli məsələlər ətrafında müzakirə aparılıb.
Həmçinin, tədbir zamanı iştirakçılar Rusiyanın Ukraynaya qarşı işğalçı müharibəsindən sonra Şərq Tərəfdaşlığı siyasətində və regionda baş verən dəyişiklikləri qiymətləndiriblər.
Assambleyada yaxşı idarəetmə və qanunun aliliyi kimi mühüm sahəyə xüsusi diqqət yetirməklə Avropa İttifaqı, Avropa İttifaqına üzv dövlətləri və Şərq Tərəfdaşlığı hökumətləri və cəmiyyətləri arasında əməkdaşlıq da müzakirə edilib.
Bundan əlavə, vətəndaş cəmiyyəti üçün əlverişli mühitin yaradılması ətrafında fikir mübadilə aparılıb.
Assambleyanın gündəliyində kiberhücumlar və hibrid təhdidlər zamanı Avropa ittifaqı və Şərq Tərəfdaşlığı ölkələrinin daha sıx əməkdaşlıq vasitəsilə bir-birini necə gücləndirə biləcəyi məsələsi də yer alıb.